اخر المواضيع

اخر الأخبار

علشان القصة تطلع حلوة ..



العلاقات العامة بتعتمد بشكل كبير على الحدوتة، حدوتة المنتج، حدوتة التحديات اللي بتواجهك وأنت بتعمل مشروعك، حدوتة شركتك بتعمل إيه وبتقدم إيه وإزاي نستفيد منها.. إلخ، وعشان أساس شغلنا الحدوتة يبقى لازم نعرف نكتبها كويس، دي شوية نصائح كده علي ما قسم ممكن تساعدك تكتب قصة شركتك.. ودا شيء مهم على فكرة لأنك طول الوقت بتستخدم القصة سواء في خبر صحفي أو لما تحضّر سيمنار أو وانت بتقابل عميل أو بتعرض شغلك أو حتى على الموقع الإلكتروني الخاص بيك.

دوّر بنفسك جوا نفسك..

دا موضوع مهم، عشان تكتب قصة كويسة أنت لازم تدوّر على نقاط القوة اللي عندك، اتكلم مع كل اللي شغالين معاك، اسمع منهم، اعرف كل واحد بيعمل إيه؟ إيه التحديات اللي بتواجهها كل يوم؟ اسمع للعملاء واعرف هم بيحبوا إيه في شركتك؟ وتفضل تدوّر تدوّر تدوّر كده وتستخدم المعلومات في المحتوى بتاعك لدرجة إنك أنت نفسك لما تقراه تقول "يااه أنا مكنتش أعرف إننا بنعمل كل ده".

خاطبوا الناس بقدر عقولهم..

ودا مرتبط طبعًا بالفئة المستهدفة اللي أنت بتخاطبها، يعني مثلًا الكلام مع العملاء غير الكلام مع المستثمرين، حتي العملاء متقسمين شباب وكبار، ستات ورجالة.. إلخ، وبناءً عليه وأنت بتكتب لازم تكون عارف أنت بتكتب لمين وتكتب لهم بالطريقة اللي يفهموها.

حدد.. أنتِ جايه تشتغلي إيه؟

هنا في تريكة صغنونة عشان نكتبها، يعني أنت بدل ما تتكلم عن أنت بتعمل إيه (يعني إيه اللي شركتك بتقدمه) ركز على أنت بتعمل دا ليه؟ يعني مثلًا لو عندك مشروع أكل بيتي ممكن بدل ما تقول احنا بنعمل محشي ومكرونة، قول "عشان أنا شفت إن ضغوط الحياة أصبحت غير عادية عملنا محشي ومكرونة عشان نوفر وقت وجهد الست العاملة" وهكذا..

حدد.. شغلك إزاي ساعد غيرك؟

مهم إنك تتكلم عن الفايدة اللي قدمها مشروعك أو شركتك أو المنتج بتاعك، الفايدة اللي بتعود على المستخدم، مثلًا وفر فلوسه أو وفر وقته أو حياته اتغيرت.. فكّر بره الصندوق وخليك مبدع.

ارتدي قبعة الصحفي

وأنت بتكتب فكّر بطريقة الصحفيين، إيه اللي يشد الناس؟ هل هو الاختلاف ولا إنهم يعرفوا أخبار ولا نتكلم بالأرقام ولا أتكلم عن التاريخ العريق ولا أتكلم قد إيه احنا تعبنا عشان نوصل؟ المهم إنك تكتب حاجة الناس تقراها ومتزهقش ولا تمل منها.

احتفل بالنجاح

قصص النجاح هي أكتر حاجة تجذب انتباه الناس، اتكلم عن نجاحك ونجاح المنتج ونجاح الموظفين ونجاحك مع العملاء.. متفوتش فرصة ممكن فيها تتكلم عن شركتك أو مشروعك، ما تخليهاش تعدي كده من غير ما تستغلها لصالحك..

وبكده أكيد الحدوتة هتطلع حلوة مفيش كلام.. بعد ما تكتب قصتك ابعتها لنا واحنا ننشرها في قسم أخبار الشركات.

ليست هناك تعليقات