اخر المواضيع

اخر الأخبار

أPRـاج

"أستطيع أن أرى ما هو في الأسفل من خلال النظر إلى أعلى".
تايكو برايي (1546-1601) عالم فلك دنماركي 

سواء إتفقنا أو أختلفنا إلا إننا ما نقدرش ننكر إن التنجيم والأبراج شَغل تفكير الإنسان من بداية التاريخ الإنساني. بل وإن تاريخ العلم دا يرجع لسنة 2000 قبل الميلاد في الحضارات القديمة في آسيا، وأوروبا، والشرق الأوسط بما فيهم البابليين القدماء والمصريين القدماء، وسبب إهتمام القدماء بالعلم دا راجع لهوس الإنسان بمعرفة المستقبل ورغبته إنه يعرف معلومات أكتر سواء عن حياته الشخصية أو عن حياته العملية والعقابات اللي ممكن يقع فيها وإزاي يتخطاها. 

وعلى الرغم من إعتبار "التنجيم" علم زائف في بعض الأحيان إلا إنه لعب دور هام في تشكيل الثقافة بل وإن في العصور القديمة كانوا بيستعينوا بالمنجمين قبل الخروج في الحرب ودا عشان يقرأوا الطالع ويعرفوا مستقبلهم. 
من متابعتنا لفريقنا في sPRk اكتشفنا إن كل وظيفة بتجذب أنواع معينة من الأبراج، ودي كانت خلاصة متابعتنا وتحريتنا واستقصاءنا عن الموضوع. وأولًا الأبراج عددها 12 برج معتمدة على الكواكب والأجرام السماوية وبتقسم السما لـ12 قطعة متساوية بتتكون كل واحدة منها من 30 درجة. 

أما عن الأبراج نفسها وتوافقها مع كل وظيفة في الشركة: 

1- برج الحمل: 

الحمل. برج حريص وسريع البديهة وبيحب المنافسة، وكمان قائد ناجح. وعشان كدا فهو ينفع جدًا لوظائف زي إنه يكون مدير تنفيذي أو حتى إنه يكون مساعد مدير. 
إلا إن مشكلته إنه مش صبور وأحيانًا مجادل وفي بعض الأحيان الخوف بيسيطر على قراراته. 

2 - برج الثور

البرج دا بنسميه (الجوكر) فهو ديمًا شخص يعتمد عليه أيًا كان منصبه فهو عملي وصبور دا غير ذوقه الراقي في إختيار الموسيقى. عشان كدا بنشوفه ناجح في وظائف زي إنه يكون محرر جيد وكمان مدير شاطر، دا غير إنه مسوّق جيد جدًا. 
مشكلة البرج دا إنه عنيد جدًا وفي بعض الأحيان بيبقى عنده حب للتملك، فإياك تحاربه على مكانه أو تسكاته وكمان هو كاره للقيود فغالبًا ممكن نوصفه على إنه مشاغب.

3- برج الجوزاء 

البرج (الكريتف أو المبدع) أي شغل محتاج أفكار جديدة يبقى لازم ننادي برج الجوزاء، فهو بيحب يتعلم وكمان عنده أفكار كتير Out of box وبيتكيف على أي وضع هو فيه وبيقدر يشتغل تحت ضغط. 
إلا إن مشكلته مع المدير ديمًا إنه متقلب جدًا وأحيانًا مش بيبقى في مزاج الشغل وبما إنه فنان فهو فوضوي شوية‘ فهو أحسن واحد يشتغل مصمم جرافيك. 

4- برج السرطان 

برج الـ Sensitive of generation أحسن واحد في التيم للتعامل مع العملاء، سواء مسؤول الإتصالات أو مساعد المدير لأنه أكتر واحد حساس ومتحدث لبق.
إلا إن مشكلته ديمًا هى كونه مش واثق من نفسه.

5- برج الأسد

أو (الكنج) من اسم البرج لازم تعرف إنه ملك المكان وغالبًا ما بيكون المدير أو المسوّق ودا لأنه مبدع وقائد وكمان مرح.
إلا إن مشكلته ديمًا تتلخص في عدم مرونته والعِناد وأحيانًا اهتمامه الزائد بنفسه.

6- برج العذراء

أكتر برج (محب للكمال) والصفة دي تعتبر ميزة وعيب في نفس الوقت، لأنه بيهتم بإن شغله يطلع من غير غلطة، دا غير إنه عملي ومخلص لشركته كل الصفات دي تجعل منه شخص قلق أغلبية الوقت، وهو بيتألق كمدير تنفيذي أو كمحرر وكمان لو إشتغل مسوّق.

7 - برج الميزان 

(دبلوماسي) الشركة. ديمًا دا الشخص اللي بيحللنا كل المشاكل اللي بنواجها مع العملاء عبارة عن قسم crisis management يمشي على قدمين، عشان كدا هو أفضل مساعد للمدير أو مسؤول تواصل مع العملاء.
مشكلته كدبوماسي هو كون قراراته غير حاسمة وفي أكتر الأوقات بيتجنب المواجهات. 

8- برج العقرب 

(الجندي المجهول). من أفضل الاشخاص اللي يشتغلوا من الكواليس ويحققوا نجاحات من غير ما يتم ذكر أسماءهم، فهمّا في اغلب الأحوال بيتميزوا بالشجاعة والحيلة ويقدروا يحلوا أي مشكلة حتى لو مش من إختصاصاتهم، العقرب محرر شاطر لأنه بيعرف يجذب القارئ بكتاباته وكمان مسوّق مقنع ومصمم جرافك مبدع.
إلا إن مشكلته تتلخص في كونه عنيف في ردود أفعاله وعشان كدا الأحس إنه يبعد عن أي تعامل مباشر مع العملاء. 

9- برج القوس 

(الروح الحلوة). من أكتر الأبراج المرحة والقادرة على إنها تدخل قلبك وبالتالي تقنعك بأي حاجة، فيعتبروا من أحسن المسوّقين ومصممي الجرافيك.
مشكلتهم تتلخص في بيت شعر لنزار قباني "وعدت باشياء اكبر مني فماذا بنفسي فعلت؟ "

10-برج الجدي

(المدير). هو المدير بجدارة لأنه منضبط جدًا في أفكاره وأفعاله.
إلا إن مشكلته إنه بيجنب الجانب الإنساني أو العاطفي في الشغل فغالبًا ما بيوصفه الموظفين بالقاسي لأنه ما بيتنازلش أو يسامح في اي حاجة تمس الشغل. 

11- برج الدلو 

مستودع الـ Motivation، شخص عنده قدرة خارقة على رؤية الأمور من كل الجوانب من غير أي إنحياز أو حكم مسبق وعشان كدا بنشوفه مدير ومصمم ناجح.
إلا إن عيوبه هي إنه شخص مزاجي جدًا وعنيد وبيرفض إظهار مشاعه. 

12-برج الحوت

هو الشخص اللطيف والطيب في التيم، من افضل الناس اللي تتعامل مع العملاء لأنه بيعرف يـ handle الأمور بتجنبه الخناقات أو النزاعات. شخصية مثالية زي دي تكون أفضل شخص يمثل الشركة ويتواصل مع العملاء إلا إن مثاليته دي وثقته المفرطة بتخليه حساس فغالبًا هتلاقيه Out of mood 

أخيرًا وليس آخرًا المقال دا غير حقيقي وغير واقعي وساخر حبينا فيه نربط العلاقات العامة بواحدة من أقدم العلوم -التنجيم- إلا إن الإعتقاد الزائد في العلم دا ممكن يوقعك في مشاكل زي ما حصل في اليابان سنة 1966 لما توقع المنجمين إن النساء المولودين في السنة دي هتكون زيجاتهم فاشلة وغير سعيدة ودا أدى إلي إنخفاض عدد المواليد في السنة دي بنسبة 25% بل وأكتر من نصف مليون حالة إجهاض! 
فركز في حياتك وقدراتك ونميها. بلاش تصدق الأحكام المسبقة اللي بتقولها الأبراج.

ليست هناك تعليقات