اخر المواضيع

اخر الأخبار

طلع الجرافيك ديزاينر اللي جواك


أهل زمان قالو "الصورة تساوي ألف كلمة"
شغل العلاقات العامة يعتمد على الصور طول الوقت وخلونا نفتكر دايما ان في شغلانتنا دي الثانية بتفرق، ومفيش حد فينا مبيعانيش من مصممين الجرافيك، احنا والعميل بنطالب بالسرعة. ومصمم الجرافيك عايز ياخد وقته علشان دا فن وابداع وكده دا غير اننا اذا طلبنا أي تعديل كده انت كأنك غلط في الذات العليا، ومبنكونش عارفين هل ترضي العميل علي اساس ان "العميل دائما على حق" ولا نفضل تحت رحمة مصمم الجرافيك اللي دايما مقتنع انه هو اللي علي حق؟

أحنا فى بالعربي PR دورنا وجربنا. وجبنا الخلاصة، في حلول سهلة وبسيطة ومجانية يعني مش هتكلفك غير شوية وقت، الادوات اللي هنتكلم عنها ميزتها سهولة الاستخدام وكمان في منها أدوات تقدر تستخدمها من الموبايل او الكمبيوتر يعني لو عندك تغطية إعلامية لحدث مثلا في ثواني تقدر تصور وتصميم وتنشر.

كانفا - Canva

احنا في بالعربيPR بنحبه وتقريبا احنا بنستخدم التطبيق في 90% من شغلنا، اولا هو تطبيق ظريف سهل الإستخدام متوفر كموقع إلكتروني ومتوفر كتطبيق للموبايل كمان، كانفا فيه أكثر من 8000 نموذج وسعة تخزين 1 جيجا بايت تقدر كمان تشارك التصميمات مع 10 من فريق العمل بتاعك، وكل دا متوفر بالنسخة المجانية، وهي فعلا فيها كل الإحتياجات الأساسية، وفي حالة التوسع في أعمالك تقدر ترقي حسابك في أي وقت. من وجهة نظرنا العيب الوحيد في التطبيق هو إمكانيات اللغة فمع الأسف اللغة العربية مش متاحة على التطبيق في النسخة المجانية، تقدر تشوف الموقع من هنا.

الديزاينر - Desygner 

التطبيق دا بيشبه كتير تطبيق كانفا، وهو متاح في نسخة موقع إلكتروني بالإضافة إلي تطبيق الموبايل، تقدر في التطبيق دا انك تشارك التصميم مع فريق العمل، الميزه اللي فيه هي استخدام اللغة العربية يمكن النماذج المتاحة في التطبيق دا اقل من اللي موجوده في كانفا، الباقة المجانية فيها كل الاحتياجات الأساسية من وجهة نظرنا مش هتحتاج للباقة المدفوعة الأجر، تقدر تشوف الموقع من هنا.

بابلو - Pablo

الأداة دي بسيطه بزيادة، مميزاته انه مجاني دا غير ان استخدام اللغة العربية على التصميمات متاح مع الاسف التطبيقات دي منقدرش فيها نستخدم خطوط كتير في العربي، التطبيق سهل جدا في الإستخدام وزي ما قلنا هو بسيط، احنا بننصح بيه في التصميمات البسيطة والسريعة، التصميم متاح في نسخة الموقع الإلكتروني فقط وتقدر تستخدمه من هنا 


الأستنسل - Getstencil

البرنامج لطيف جدا وسهل الإستخدام، طبعا هو مجاني إلي حد ما لكن الباقة المجانية كافية جدا للاستخدامات الاساسية، التطبيق متاح فقط على نسخة الموقع الإلكتروني، التطبيق من وجهة نظرنا يمكن اقل من التطبيقات اللي اتكلمنا عنها فوق لكن شغال وكمان بيدعم العربي ودي ميزة مهمه بالنسبه لينا.

جيفي - Giphy

طبعا الـGIF من الحجات اللي اصبحنا مش عارفين نستغني عنها في شغلنا، التطبيق دا عظيم ومفيش اسهل من كده وتقدر بسهولة تعمل كل الـGIF اللي نفسك فيه، التطبيق مجاني وفيه مميزات انك تقدر تشارك تصميمك على كل شبكات التواصل الإجتماعي او تحميل التصميم على جهاز الكمبيوتر، وهو متاح من خلال نسخة الموقع الإلكتروني نتمني قريبا يكون في نسخة الموبايل من هنا ممكن تستخدم الموقع.

اكيد دي مش كل الأدوات في مئات التطبيقات سواء علي الإنترنت او من خلال الموبايل، لكن دي الأدوات اللي احنا جربناها بنفسنا وزي ما تقولو كده عارفين اولها من اخرها، ومتأكدين من مدى كفاءتها في انجاز شغلكم، علشان يكون الموضوع مفيد ليكم احنا حطينا فيديو مع كل أداة بيشرح ازاي تستخدمها، وفي النهاية دي شوية نصائح ناخد بالنا منها علشان الصورة تطلع حلوة 
  • أختار الفونت المناسب للموضوع واللي تقدر من خلاله توصل رسالتك اسهل.
  • لو بتستخدم اي الوان مع الصورة يبقى التزم بألوان البراند ودرجاته.
  • الصور اللي تستخدمها لازم تكون الجودة بتاعتها جيدة.
  • كل ما كان تصميم الجرافيك بسيط كل ما كان أفضل.

هناك تعليق واحد: