اخر المواضيع

اخر الأخبار

إزاي تروج لمقالك على الانترنت؟


الكتابة للإنترنت مختلفة، وعرفنا قبل كده إزاي تكتب مقال للانترنت، بس الكتابة مش كل حاجة، انت ممكن تكتب مقال عظيم يضاهي في عظمته مقالات أعتى كتاب العالم، لكن من غير الترويج الصح ليه محدش هيشوفه وتبقى كأنك معملتش حاجة، وللأسف الموضوع مش هيكون سهل لانه بيتعلق بتقنية الـ "SEO" أو تحسين آليات البحث، لكن عشان تروج لمقالك صح على الانترنت دي شوية نصايح.

قبل ما تبدأ في الكتابة فانت محتاج تعرف عن السوق اللي هتكتبله، أي مقال ليه سوق مستهدف وعشان تكون في الصدارة لازم تدرس امكانيات الآخرين، وده مهم :
1- دراسة المنافسين: يعني المواقع والمدونات اللي نشرت قبلك مقالات في نفس الموضوع اللي هتكتب عنه، وركز على نقط القوة والضعف وطريقة تقديم المحتوى والأسلوب وخلافه ..

2- جمّع أكبر عدد من المعلومات حول الموضوع: في مرة كنت هكتب مقال عن شركة ما، ومديرتي في الشغل صممت اني اعمل "اكسل شيت" يجمّع كل المعلومات عن الشركة والشركات المنافسة، ولما سألتها ليه قالتلي: "لازم نفهم الناس اللي هنكتب عنهم." كل ما المعلومات القيمة في مقالك هتزيد كل ما نسبة انتشراها هيكون أحسن، حاول إن كتاباتك تكون غنية ومميزة لأبعد حد.

بعد دراسة السوق المنافس ليك، وبدأك في الكتابة دي حاجات في قلب الموضوع نفسه هتساعدك على تسهيل عملية نشره وتكبر احتمالات نجاحه، وهم :

1- الكلمات الدلالية :
يعني مثلاً لو هتكتب موضوع عن "طريقة ترويج مقالك على الانترنت" فكلمات الدلالية الخاصة بيه هتكون:
-مقال
-ترويج
-دعايا
-انترنت
-كتابة
وقوم بتوزيعهم هم وأي كلمة متعلقة بموضوع مقالك في كل عناصر المحتوى، من أول العنوان وحتى الخاتمة، بس بعقل عشان محركات البحث متعتبرش مقالك "سبام" أو خدعة لجلب الزوار، لإن آليات البحث عند تصنيفها لمحتوى مدونتك بتعتمد على الكلمات دي عشان تعرف نوع المحتوى المناسب لكل طلب بحث.

2- عنوان المقالة:
زي ما قولنا في النقطة السابقة، مهم إن العنوان يتوافر فيه كلامات دلالية مرتبطة بالموضوع.
ومهم يكون العنوان قصير ميزيدش عن 5 أو 6 كلمات عشان ميظهرش في نتائج البحث مقطوع، والنتائج المقطوعة غالباً ما بيتجاهلها الزوار.


3- المتن :
متن المقال هو أساسه، هو المنطقة اللي بتدخل فيها في صلب الموضوع، تقدر تكتب فيه براحتك، بس يُفضل استعمال العناوين الجانبية، لإن آليات البحث بتعتمد على العناوين لتصنيف المحتوى. وكل عنوان ممكن يحتوي على كلمة دلالية واحدة على الأقل، ويستحب إنك تزين موضوعك بصور تلائم الكلام لانها بتساعد على جلب الزوار.

4- الخاتمة :
وهي أربع أو خمس جمل في نهاية الموضوع لإظهار نتائج النقط السابق تناولها  وإنهاءه، مع إدخال الكلمات الدلالية في الجمل.

ومهم إستخدام الرابط التشعبي "Hyper Link" لربط مقالاتك ببعض، بس متستخدموش أكتر من تلات مرات في الصفحة الواحدة والأقوى انك تستخدمه مرة، والرابط التشعبي هو وجود لينك لمقال تاني وسط مقالك الأصلي زي "يعني ايه أونلاين PR"، وتقدر تحط صور أو انفوجرافيك أو رسم بياني لتوضيح كلامك، بس اتأكد ان جودة الصورة حلوة.

وبس تقدر دلوقتي تخرج للعالم بمقالك.

ليست هناك تعليقات