اخر المواضيع

اخر الأخبار

إزاي تكتب مقال للإنترنت؟


"المقدمة، بتبدأ الكلام وتدي نبذة عامة عن فكرة موضوعك".

الكتابة من أهم أدوات العلاقات العامة، وفي الواقع لولا إن الأدوات تعتبر حلقة واحدة متصلة بتكمل بعض عشان تطلّع صورة مثيرة كنت قلت إن الكتابة أهمهم على الإطلاق.

والقاعدة الذهبية في الكتابة عموماً هي "لكي تكتب لابد أن تقرأ" .. القراءة كل يوم في موضوعات مختلفة ومتنوعة، هتوسع مداركك وتمنحك القدرة على كتابة مقالات في مجالات مختلفة على عكس تحجيم قراءاتك في مجال واحد، وعشان تكتب مقال على الإنترنت فانت بتقدمه لجمهور مختلف تماماً عن جمهور الصحف والمجلات الورقية، القراء هنا محتاجين المعلومة الأسرع والأذكى وطريقة العرض الشيقة، وكل ما كان الكلام أقل وأدل كل ما تجنب الكاتب إملال الجمهور وكان الإقبال على الموضوع أكبر.

"المتن، قلب الموضوع".


في البداية لازم تتعرف على أهم مكونات المقال، وهي العنوان والمتن والخاتمة، وحاول إن عنوان مقالك ميزيدش عن أربع أو خمس كلمات، وإلا هيطلع في نتائج البحث مقطوع أو مش كامل وهيقلل نسبة زيارة الناس ليه، بس عموماً ككاتب ليك الحرية في البدأ بترتيب أفكارك من أي نقطة فيهم، بمعنى ان ممكن يخطر على بالك العنوان قبل ما تبدأ فيه وممكن تبدأ بالفكرة والبحث.

والبحث ثم البحث يا ولدي، فمهم جداً إن الكاتب يدور في الموضوع اللي هيتناوله عشان يكون موضوعه كامل ودقيق،حتى لو اضطريت للبحث في مواضيع بلغات مختلفة متترددش في استخدام برمجيات الترجمة الالكترونية، بس المهم إن الصياغة النهائية للجُمل تكون بإيديك.

ومش محتاجة أقول إن ترتيب الأفكار هو أول خطوة في كتابة مقال كامل، حتى لو الرؤية في الأول مش واضحة خليك معاها لحد ما توصل لصورة كاملة لموضوعك وهتلاقيها بتوضح كل ما تتعمق في الكتابة. المهم تكون الصورة الأولية للموضوع في بالك، وتبقى عارف انت رايح بالكلام لفين. قبل ما تبدأ في الكتابة جمع "اللينكات" المرتبطة بيه، وحطهم في فايل مخصوص عشان ميضيعوش وسط زحمة المواقع.

الكتابة الصحيحة هتجنبك الإبتذال، احرص على استخدام أدوات الترقيم بصورة صح، وتجنب الأخطاء الإملائية، احنا كبار مينفعش نتلغبط بين ال "ز" وال "ذ".

وفي كتاباتك للانترنت حاول تستخدم "Hyper Link" أو الرابط التشعبي يعني تربط مقالاتك ببعض، عشان تعرّف الناس بمقالاتك المرتبطة بنفس الموضوع وتزود نسبة البحث في المدونة أو الموقع الخاص بيك، بمعنى "إزاي تروج لمقالك على الانترنت" -لينك المقال ده- شوفت أنا عملت ايه؟
وممكن تعبر عن كلامك بالصور أو "الانفوجرافيك" او الرسوم البيانية لو لزم الأمر، عشان كلامك يكون أوضح.

"الخاتمة، ملخص النقط اللي تناولتها وختام الكلام".

وأخيراً ..
لو لقيت أي خطأ في كتاباتك السابقة مترددش إنك تعدلها، انت متعرفش مين ممكن يقراها، واستمتع وانت بتكتب، الكتابة عمل إبداعي رائع، تجميع حروف والتعبير بيها عن أفكار يعتبر سحر، وانت الساحر.

ليست هناك تعليقات