اخر المواضيع

اخر الأخبار

4 حاجات لازم تعرفها قبل ما تتعامل مع شركة علاقات عامة


عملت شركتك وبدأت في الشغل وأخيرًا جاتلك الفرصة عشان تشارك قصة صعودك ونجاح ماركتك في مكان أبعد من تربيزة مطبخ تيتا !
أكيد كنت خلاص مستعد عشان تروج لماركتك، بس لقيت الموضوع أكبر مما تخيلت !
في مرحلة ما بتلاقي إن الوقت بقى مناسب عشان يساعدك شخص محترف، وفي الحالة دي وكالة علاقات عامة هتعتبر صديق عظيم ليك كرائد أعمال ناشئ، لإنها وظيفتهم إنهم يتعاملوا مع الوسائل المؤثرة زي الصحافة الإلكترونية والشخصيات المؤثرة في مجالك، وبيكبرولك الصورة عشان تقدر تتعرف بوضوح على الفروق الدقيقة اللي بين أنواع الدعايا المختلفة. *هايبر لينك يعني ايه Online PR*

بس قبل ما تتكل على الله وتمضي العقد، خلّي الأربع نقط دول في بالك عشان تبقى واثق إنك بتحط علامتك التجارية في الإيد الأجدر :

1- الكمية لا تغلب النوعية :


واحدة من أكبر المفاهيم الغلط المتعلقة بالترويج لنفسك أو لعلامتك التجارية هي فكرة إن أكتر يعني أحسن، وده يمكن يكون صح في أحيان كتير بس في الحالة دي يعتبر غلط كبير، لإن لما الموضوع بيتعلق بمشاركة قصتك مع وسائل الإعلام، فانت مش بس عايز تركز ظهورك مع القنوات والمحاورين اللي هيوفرولك نسبة مستمعين كبير، إنما محتاج تظهر مع المحاور اللي هيعرف يتكلم بالطريقة الصح لجمهورك المستهدف، عشان يساعدك على نشر فكرتك بالطريقة الأنسب، وتكونوا على أرض واحدة خلال الحوار، مش "بتأذن في مالطة" والمحاور مش فاهم !
ومهم جدًا التركيز على أماكن وجود الجمهور، يعني مثلًا لو انت صاحب مطعم وعايز تروج ليه فخمس مقالات كبيرة في صفحة الأهرام الرياضية مش هتفيدك، وبالمثل فخبر صغير في مجلة أكل كبيرة هيكون أفيدلك من أربع أخبار في مدونة طعام محلية، لإن نسبة وصولها للناس أكبر.
ومسؤول العلاقات العامة الشاطر هيشتغل عشان يوفرلك منصات إعلامية مفيدة لماركتك، مش يدهشك بنشاط إعلامي كبير وفي الأخر ميصبش حاجة في صالحك !
لذا يا صديق، يمكن مقولة "كلما زاد العدد زاد المرح" بتنطبق على حاجات كتير بس الأكيد إنه مش كلما زاد العدد زادت الفايدة.

2- مين فريق العمل؟

دي نقطة مهمة: بما إن وكالة العلاقات العامة عادة بتعين فريق عمل مسؤول عن كل عميل، فهيكون معاك مجموعة أشخاص محددين. الأول اعرف مين حلقة الوصل في الفريق، لإن الأفضل إنك تتعامل مباشرة مع شخص واحد عشان تسهل عملية التواصل.

انت كمان محتاج في الفريق على الأقل شخص واحد محترف وليه علاقات في المجال ويقدر يوصلك بالصحافيين والمؤثرين في جمهورك المستهدف، يعني مثلًا في شخص ممكن تكون قائمة اتصالاته متشعبة جدًا وعنده معارف مهمين بس لو انت بتنتج لعبى أطفال فالـCNBC بجلال قدرها مش هتفيدك !
أخيرًا، مهم جدًا تعرف إن وسائل زي الكتابة ومواقع التواصل الإجتماعي متاحين ليك، بما انهم من أهم أدوات حملة العلاقات العامة، فمهم تتأكد إنك في حملتك هتحصل على أفضل محتوى، من أول التصريحات الصحافية المهمة لحد "التويتات" ومنشورات "فيسبوك".

3- قياس النجاح :

ممكن تسأل "إزاي ممكن أقيس حجم النجاح؟"
الإجابة لسؤالك هي كلمة واحدة: الإحصاءات.
مفروض إن وكالة العلاقات العامة الخاصة بيك توفرلك مزيج من التقريرات اليومية والاسبوعية والشهرية، فيهم لمحة شاملة عن مدى نجاح وفاعلية الإستراتيجية الإعلامية اللي بتغطي العلامة التجارية الخاصة بيك، وتوضحلك موقع صناعتك على الخريطة التجارية، يعني احنا بقينا فين ومدى نجاح حملاتنا إيه.

4- الدفع :

بالنسبة لموضوع الدفع، فعشان تحصل على مساعدة علاقات عامة شاملة فانت غالبًا هتدفع ملبغ ما شهريًا بناءً على عدد ساعات شغل معينة، وده يعتبر معيار التعامل المالي في المجال.
بس قبل ما توافق وتطلّع الشيك فانت محتاج تعرف من الشركة الساعات دي هتتقضى إزاي، وإزاي هتكمل بعد نهاية الحملة، ولو عايز تكمل في الحملة للأخر أو تستمر لمدة أطول بعد انتهاء العقد نظام الفلوس هيكون ايه؟ لإنك أكيد مش عايز تمشي تلت أرباع الطريق في حملة علاقات عامة عشان بعدها تعرف إن الشركة هتحاسبك الضعف عشان تكمل في مشروع الحملة. وأول ما تبدأ في الشغل معاهم، اسأل عن عدد الساعات الاسبوعية عشان تقدر ترتب خطتك وفقًا لده.


خليك فاكر إن كل ما شركة العلاقات العامة كبرت كل ما سعرها هيكون أغلى، فحط الشركات الأصغر في بالك وانت بتدور على الشركة المناسبة ليك، وخدها سر عمر ما شركة علاقات عامة هتقوله ليك: مفيش أي شخص في أي شركة علاقات عامة مهما كانت كبيرة يقدر يضمنلك فرقعة إعلامية 100%. هم يمكن يكون عندهم علاقات صحفية جبارة أو شخص خارق يقدر يوصلك لأشهر برنامج في مصر، بس في عوامل كتير تقدر تأثر على توفير مقابلة تلفزيونية ليك، وحتى أكبر شركة دعاية في الكون متقدرش تسيطر عليها -زي الأخبار العاجلة مثلاً- ، فلو بتتعامل مع شركة حلفتلك يمين وشمال إنها هتخليك تطلع مع أشهر مذيع في الكوكب والكواكب المجاورة، خلي بالك.



دلوقتي تقدر تنطلق وتدور على شركتك المناسبة، ولو لسه بتفكر في مدى حاجتك لشركة PR، شوف 10 حاجات العلاقات العامة هتفيدك فيها كستارت أب.

ليست هناك تعليقات