اخر المواضيع

اخر الأخبار

1o نصايح عشان تلاقي شركتك المناسبة

بتفكر في الإستعانة بشركة علاقات عامة؟
النصايح دي ممكن تساعدك.

مبدئياً العلاقات العامة لو اتنفذت صح تعتبر من أهم وأقوى أدوات التواصل مع الناس، لإنها بتمس بمهارة متطلبات السوق وبتابع تجدد الجمهور اللي بتستهدفه كل يوم، وبالعربي بتشوف "التريند" فين وبتمشي معاه، بل الأكبر أوقات كتير هي اللي بتخلقلك "التريند". ويمكن عملية اختيار الشركة المناسبة ليك تبان سهلة، بس في الواقع هي ليها متاعبها.
في وقتنا الحالي صعب تتجاهل العلاقات العامة، وصعب تنحيها من استراتيجيتك التسويقية، وأهم مثال على كده إن في أمريكا فاق عدد مسؤولين العلاقات العامة عدد الصحفيين بنسبة 1:4، ولك ان تتخيل نفوذ وتأثير العلاقات العامة على الصحافة أو نسبة تأثير رجالها على الصحفيين، فلو مكنش التأثير مباشر فطبيعي بيتم التأثر من الاخبار اللي بيسمعوها أو بيقرولها وأصلها جه من مسؤولين علاقات عامة، وده لإن كل خبر العلاقات العامة بنتشره لازم يكون مميز، وده بيرجعنا للجهد اللي اتكتب بيه الخبر والمراحل اللي عدى بيها عشان يتنشر ويوصل ويأثر مع الجمهور، كل ده يأكدلنا ان العلاقات العامة مش سهلة وان تنصيب خبر أصعب من مجرد كتابة بيان صحفي.

كل ده بيدل على إن العلاقات العامة مش سهلة، ونتائجها مش بتظهر بسرعة، هي نتائج بتظهر مع الوقت، وأكيد صعب إن شخص واحد يقوم بكل مهام رجال العلاقات العامة، وعشان كده شركات كتير عينت ناس داخل قسم علاقات عامة بيشتغلوا من الشركة نفسها، وشركات تانية استعانت بشركات متخصصة في العلاقات العامة، وزي ما هتقرا فالاتنين ليهم مزاياهم وليهم عيوبهم، والنصايح دي هتساعدك في عملية اختيارك للشركة الصح.

10 نصايح فكر فيهم وانت بتختار شركة العلاقات العامة الخاصة بيك:

1- وانت بتختار شركة علاقات عامة، حدد أهدافك :

مهم تحدد أهدافك قبل ما تتعمق في قرار الاستعانة بشركة، وضروري تدرك ان الاستراتيجية هي الخطوة الأولى للنجاح وبتقودك لإنجاز التكنيك اللي محدده، وأنا مؤمنة بإن الاستراتيجية الكويسة بتدأ من الأهداف.
وانت بتدور عشان تعين شركة علاقات عامة قرر انت بتحاول تحقق ايه، يعني مثلاً عايز توعي الناس عن البراند بتاعك ولا بتدور على الانتباه لمنتج او برنامج معين .. إلخ.

2- وانت بتختار شركة علاقات عامة، اتأكد من دراستك لكل الخيارات المتاحة:

إزاي شركتك تهتم بقسم العلاقات العامة بشكل فعال؟ توظف شركة علاقات عامة ولا توظف أفراد يشتغلوا من جوه الشركة؟
الجواب هيكون مختلف من شركة للتانية،  لإن شركة العلاقات العامة لو متمش إدارتها من قبل شخص بيفهم في متطلبات السوق فهو مش هيحقق ولا يدرك أمكانيات الشركة كلها. والمسؤول محتاج يكون عنده معرفة بالبراند والمنتج والاهم يكون عنده مداخل للاستراتيجية وطرق لتنفيذها، والأفرد المسؤولين عن العلاقات العامة بداخل الشركة ممكن يخلوا ده صعب،  بس أقدر أقول إن الانسب هو المزج بين الاتنين، ولو المزج ده مش متاح، فانت محتاج تختار بينهم على حسب ميزانيتك.

3- وانت بتختار شركة علاقات عامة، ايه الانسب تسأل عن مقترح ولا لا؟

دايما متاح ليك خيار انك تتعامل مع شركة انت بالفعل عارفها، أو سامع عنها سمع خير، بس لو فكرت تجرب التعامل مع شركة مسمعتش عنها قبل كده فأنا بقترح عليك تطلب منهم يبعتولك "مقترح" أو proposal فيه هيعملوا ايه وهيتكلف كام وهكذا..
والمهم انك تعين مسؤول علاقات عامة بسابقة أعمال مرتبطة بالأهداف اللي انت راسمها عشان يساعدك على تحقيقها. لو عمرك ما مريت بعملية طلب المقترح، فالعملية ممكن تكون صعبة، بس مراحلها ببساطة هي:
1- في الأول انت محتاج تحدد أهدافك، وتقرر انت عايز تحقق ايه بالظبط.
2- بعدين تعمل قايمة من 10 شركات محتملين، ونوع خياراتك فيها لإنك عايز توزن بعناية قدرات الشركة لتحقيق أهدافك.
3- ومن هنا تقدر تتواصل مع كل شركة على حدى، عشان تقيس مدى أهتمامهم وتطلب المؤهلات الخاصة بيهم، وده من شأنه إنه يقلل قايمة الاحتمالات.
4- اللي هيبعتولك مؤهلاتهم عشان تراجعها اختار منهم 3 مثلاً، وحدد مين فيهم يقدر يساعدك على نجاح عملك، وتقدر تحدد اجتماع تتقابلوا فيه وكل شركة هتحددلك فريق عمل يكون شغال معاك.
لو معندكش الخبرة الكافية فالموضوع ممكن يبان متعب أو مضيعة للوقت، بس هو مهم في المرحلة دي.

4- وانت بتختار شركة علاقات عامة، حدد ميزانيتك :

النقطة دي تبان سهلة صح؟ صح، هي بطريقة ما سهلة، بس مهم انك تحدد أعلى سقف لميزانيتك.
الشركات غالية ومهم انك تقولهم بوضوح حدود ميزانيتك العامة الشاملة كل حاجة، واتأكد انهم هيبعتولك كل شهر عشان توافق الأول على أي مصاريف زيادة.

5- وانت بتختار شركة علاقات عامة، ركز على حجم الشركة المناسب ليك :

شركات العلاقات العامة بتيجي بجميع الأشكال والأحجام. ويمكن تستغرب من حجم الشركة المناسبة ليك.
في أسباب كتير تخليك تقرر الاتفاق مع شركة كبيرة زي (الوصول للعالمية، وشبكة العلاقات الواسعة، والتجربة الرائعة) بس كمان في أسباب كتير تخليك تروح مع شركة صغيرة أو متوسطة زي إنها (اصغر، فريق العمل فيها متماسك أكتر وأقرب، خبراتهم المحلية المتخصصة، والخ..)
ومهم تفكر ميزانيتك هتعني ايه للشركة، يعني مثلاً 15,000$ هو مبلغ كبير لو هتتعامل مع شركة صغيرة وفي نفس الوقات هو مبلغ عادي أو قليل لو هتتعامل مع شركة كبيرة، وخلي بالك إن العميل أو الحساب صاحب المبلغ الكبير بتخصصله الشركة الفريق الافضل عشان يكون مسؤول عن شغله.

6-  وانت بتختار شركة علاقات عامة، أطلب منهم طلبات خاصة :

لما تعين شركة وخصوصا لو مريت بمرحلة النصحية رقم "4"، فانت هيتقدملك عروض من شركات مختلفة عشان يكسبوك كعميل، بس قبل ما تقرر قرارك النهائي أطلب منهم 3 طلبات مهمة:

1- اطلب منهم يبعتولك الفريق اللي هيستلم الأكونت الخاص بيك من أول يوم في الاجتماع، ساعتها مش هتمر بتجربة انهم يغروك بأفضل فريق عمل عندهم وبعد الاتفاق تلاقيهم خصصوا فريق أقل خبرة للتعامل مع شغلك. التبديل ده هيكون متعب لشغلك ومهم تتجنبه.
2- اطلب منهم إن كل فريق العمل يكون موجود وقت تقديم العروض "البريزينتيشن"، مش بس فريق العمل لانك هتتعامل مع كل الفريق، وانت مهم تعرف تفكير كل واحد.

3- اطلب منهم يقللوا الكلام عن نفسهم كشركة وسابقة أعمالهم، انت خلاص في أوضة الاجتماع معاهم يعني أكيد متهم بالعلاقات العامة وعملت واجبك في البحث عنهم كشركة، وفر وقتك في الكلام عن الاهم.

7-  وانت بتختار شركة علاقات عامة، فكر في أهمية الكيمياء :

احرص على إن فريق العمل يعجبك، أكيد مهم انهم يكونوا مؤهلين وعندهم الخبرة والامكانيات عشان يمسكوا شغلك، بس برضه مهم انك تعجب بيهم وتحب انك تشتغل معاهم. لإن الموضوع مبيختلفش عن انك تعين موظفين في شركتك، انت عايز تعين ناس تحب انك تشتغل معاهم كل يوم.

8-  وانت بتختار شركة علاقات عامة، أكسبهم :

النصحية رقم 7 بتقود للنصحية رقم 8، وأنا بأكدلك على أهمية انك تفكر في الشركة اللي هتتعامل معاها كجزء من فريق عملك مش مجرد طرف تالت سلمته شغل. ويمكن فريق العمل اللي الشركة هتسلمه شغلك يكون شغال في أكتر من أكونت غيرك، بس انت فكر في انهم ماسكين شغلك انت بس، هم بيشتغلوا ليك ومعاك وبس.
نصيحتي هي انك تقول للشركة المحتملة في أول مرة تقابلها انك بتتعامل مع الشركات بطريقة مختلفة عن أغلب العملاء "انت عايز تعين امداد لفريق عملك، انت مش بتدور على العلاقة التقليدية بين العميل والشركة".

9- وانت بتختار شركة علاقات عامة، اتأكد ان عندهم على الأقل فكرة واحدة انت متحمسلها :

في الاجتماع الاول لو الشركة عملت الواجب وجهزت للاجتماع صح، فهيكونوا قادرين على تقديم مجموعة أفكار واقتراحات خاصة بشغلك. بس تعامل مع الأفكار دي براحة، هم لسه على البر متعمقوش أوي في شغلك ومتطلبات شركتك وبيقدموا أفكار طبقاً للمتاح ليهم من معلومات، بس مهم ان على الاقل فكرة واحدة من اللي هيقدموها تكون بره الصندوق وعاجباك وتتحمس لتنفيذها.

10- بعد اختيارك لشركة العلاقات العامة، إفهم العقد:

بمجرد ما ترسى على الشركة اللي قررت تعينها فانت هتتنقل لمرحلة الاتفاق النهائي وكتابة العقد، اتأكد انك راجعت العقد كويس وياريت تقراه مع محامي لو تقدر، ومهم تفهم جميع المصطلحات الرئيسية زي التكلفة، الميزانية، المدة، الفريق، الساعات اللي هتنفق فيها المزانية، والتقريرات اللي هتتقدملك كل فترة عشان تفلتر النتائج، وهكذا ..
ولو لقيت نقطة حابب تحط تحتها خط أحمر، يبقى التفاوض هو أحسن حل، حاولوا توصلوا لحل وسط.

في النهاية أنا مش هوعدك ان النقط دول يخلوا الدنيا بمبي، بس أوعدك انهم هيخلوا عملية اختيار الشركة المناسبة أبسط وهتقلل فرص خسايرك وتخليك تختار الشركة الصح.

ليست هناك تعليقات